Wetin Trump Immigration Law Mean for Nigerians Weh Dey America?

Bros, wahala don burst o! If you dey America dey do hide-and-seek with immigration, e be like say your time don reach.

Trump don carry him immigration hammer come again, and this time, e no send anybody papa name. As the crackdown on illegal immigrants dey hot, our Naija brothers and sisters wey don use style disappear inside Yankee don begin reason Plan B.

Some don even dey practice how to cry for airport in case dem see deportation letter. But wait first, make we check wetin really dey shelle for this deportation saga.

No be today America don dey do immigration wahala. Every president wey enter office go always find way wey e go use chase people wey dem say no suppose dey dia.

Dem get one special government squad, dem call am Immigration and Customs Enforcement (ICE), and na dem dey waka up and down dey find who dem go carry go back him papa land.

This ICE no be for drink o, e be like spiritual eye wey fit locate person wey don overstay visa, use fake document or even waka enter Yankee without gate pass. Once dem catch you, na straight deportation talk go start.

As e be so, Naija people full for Yankee no be small. As of 2015, research talk say about 376,000 Nigerians dey for America, and from 2003 to 2018, dem don use return ticket deport 5,892 Naija people.

Wetin pain pass be say no be all of dem even do bad thing. 3,019 of dem, wey be 51%, get criminal record, meaning say dem don do one or two illegal movement wey no follow.

But the remaining 2,783, dem just offend because dem no get correct immigration paper. Some people visa don expire, some waka enter without invitation, and some just believe say as dem enter America, e don be forever.

But ICE no reason am like that. Once dem catch you, na straight back to Naija you dey.

This year alone, no be small matter. By the first half of 2024, 335 Nigerians don enter ICE wahala because of immigration palava.

Some overstay visa, some enter without correct document, and some no even sabi say dem don break law. But na the 41 wey get criminal case be the wahala pass.

Some dey involved for fraud, some for drug business, some even do sexual wahala, and some carry gun when dem no suppose carry.

By the time dem finish court case, 376 Nigerians don collect deportation order. Na dat time dem begin reason how dem go take explain to their people for Naija.

Now, make we yarn about Trump own for this matter. As him enter White House for January 2025, him just dey sign paper upandan.

Him immigration wahala no be here. Him first order na to deport anybody wey e feel say no suppose dey America. Him even talk say e go stop birthright citizenship, meaning say even if pikin born for America, e no mean say e go be citizen if him papa and mama no get paper.

E still wan bring back travel ban for some countries, and Naija fit enter the list if e no take time. If you dey America without correct paper, na to just dey sleep with one eye open because once ICE locate you, na straight to airport.

Now, dem don talk say about 3,690 Nigerians dey face deportation now-now because of this new policy. But wait o, we check am well, evidence no too dey to back that number.

Deportation no be beans, no be say dem go just pack people enter flight like say na night bus go Abia. Dem go first run legal process, check document, do hearing before dem go decide who go house.

So anybody wey dey hear the number make e no too fear, but still make e no too relax. Yankee no be your papa house if paper no complete.

The matter no just affect the people wey dem go deport alone, e go still affect Naija economy. You sabi say every year, Nigerians wey dey overseas dey send like $20 billion go house?

Na that money dey help plenty families survive, build house, send pikin go school, and even do big-boy things. If dem begin deport people anyhow, that money go reduce. Some experts don talk say na big wahala be that because e go affect our foreign exchange.

If Naija government no take time, economy fit enter another kind wahala.

Wetin all these things mean? If you dey America and you never balance your paper, abeg no use faith do visa renewal. Go find lawyer make e help you check how you fit put your leg well for ground.

No go do anyhow because if ICE catch you, e go be like Nollywood movie wey director no give you script before dem start action.

Naija sef need to talk with U.S government, make dem reason how dem fit help our people. Deportation no be wetin dem suppose dey use do politics, because e no just affect individual, e dey affect country economy join.

Na wetin we go call international palava. Make everybody shine eye well because as e be so, e no sure say Trump go slow down for this immigration matter.